Tilkynningar

Allt að 750 m.kr. verður varið á þessu ári til sértækra aðgerða til að mæta félags- og heilsufarslegum afleiðingum COVID-19. Þetta var ákveðið á síðasta fundi ríkisstjórnarinnar fyrir páska. Stjórnvöld hafa frá upphafi heimsfaraldursins lagt áherslu á að vinna gegn félagslegum og heilsufarslegaum áhrifum hans, einkum á viðkvæma hópa og eru þessar aðgerðir liður í því.

Það er mat Lyfjastofnunar Evrópu (EMA) og Sóttvarnarstofnunar Evrópu (ECDC) að gefa megi einstaklingum 80 ára og eldri fjórða skammtinn (seinni örvunarskammt) af bóluefnunum Cominatry (Pfizer/BioNTech) og Spikevax (Moderna). Gögnin, sem liggja til grundvallar ráðleggingunni, sýna að meiri hætta er á alvarlegum COVID-19 sjúkdómi í þessum aldurshópi og að fjórði skammturinn veiti góða vörn.

Bóluefnið er eingöngu ætlað til örvunarbólusetningar

Sérfræðinganefnd Lyfjastofnunar Evrópu (EMA) um lyf fyrir menn (CHMP) hefur hafið áfangamat á bóluefninu COVID-19 Vaccine HIPRA, sem einnig er þekkt undir nafninu PHH-1V. Bóluefnið er ætlað til örvunarbólusetningar hjá einstaklingum sem fengið hafa fulla bólusetningu með öðru bóluefni gegn COVID-19.

Nánar í frétt EMA

‍

Í ljósi fækkunar COVID-19 smita í samfélaginu verður uppfærslum á tölulegum upplýsingum á covid.is fækkað. Frá 5. apríl 2022 verður síðan uppfærð tvisvar í viku, á þriðjudögum og föstudögum. Lendi uppfærsla á opinberum frídegi verður uppfært næsta virka dag.

Sjá nánar: https://www.covid.is/tolulegar-upplysingar

Covid-19 faraldurinn hér á landi er á hröðu undanhaldi eftir að öllum takmörkunum vegna hans var aflétt 25. febrúar síðastliðinn. Á þeim tíma var gert ráð fyrir að víðtækt samfélagslegt ónæmi gegn faraldrinum, með allt að 80% hlutfalli bólusettra og/eða smitaðra, myndi nást síðari hlutann í mars. Þetta virðist hafa gengið eftir. Álag á heilbrigðisstofnanir fer minnkandi og smitum fækkandi sem m.a. má sjá af því að hlutfall jákvæðra sýna af heildarfjölda greindra smita hefur lækkað. Í dag, 4. apríl, liggja 35 sjúklingar með Covid-19 smit á Landspítala, þar af 1 á gjörgæslu og hafa ekki verið færri síðan 12. febrúar síðastliðinn.

‍

Ákveðið hefur verið að gera breytingar á sýnatökum vegna Covid-19 frá og með næstu mánaðarmótum. Frá föstudeginum 1. apríl mun Heilsugæsla höfuðborgarsvæðisins eingöngu bjóða upp á PCR-sýnatökur á Suðurlandsbraut 34 en hægt verður að bóka hraðpróf vegna ferðalaga hjá einkaaðilum.

‍

Með tilkomu ómíkron afbrigðis SARS-CoV-2 veirunnar sem veldur COVID-19 varð gífurleg aukning á smitum í samfélaginu á Íslandi sem og annars staðar í heiminum. Ómíkrón greindist fyrst í desember 2021 en hafði náð yfirhöndinni yfir delta afbrigðinu í janúar 2022. Hér á landi hefur verið greiður aðgangur að gjaldfrjálsri sýnatöku vegna COVID-19 og voru PCR próf eingöngu notuð til að staðfesta smit þangað til skipt var yfir í hraðpróf í lok febrúarmánaðar 2022. Sóttvarnalæknir fær sendar allar rannsóknarniðurstöður enda COVID-19 tilkynningarskyldur sjúkdómur. Endursmit hérlendis er skilgreint í samræmi við leiðbeiningar sóttvarnastofnun Evrópu (ECDC) ef sami einstaklingur greinist tvisvar og 60 dagar eða meira eru á milli greininga. Í ákveðnum tilfellum hefur endursmit verið skilgreint innan 60 daga skv. mati COVID-19 göngudeildar Landspítala.

‍

Sóttvarnalæknir mun nú gefa út batavottorð vegna COVID-19 á grundvelli staðfestrar COVID-19 / SARS-CoV-2 sýkingar erlendis. Byggir þetta á reglugerð ráðherra nr. 777/2021 um reglugerð ESB nr. 2021/953 frá 14. júní 2021 og breytingu ESB nr. 2022/256 frá 22. febrúar 2022.

‍

Landspítali er á hættustigi frá og með hádegi í dag 28. mars 2022. Á Landspítala eru 60 einstaklingar með Covid. Af þeim er 51 með virkt smit en 9 hafa lokið einangrun á Covid deildum og bíða flutnings. Tveir eru á gjörgæslu, báðir í öndunarvél. Nú eru 2 börn inniliggjandi með Covid.

Mikilvægt er að þeir sem hafa greinst með COVID-19 og eru með einkenni fylgi tilmælum Embættis landlæknis og almannavarnadeildar ríkislögreglustjóra. Lyfjastofnun mælist eindregið til þess að COVID-19 smitaðir einstaklingar með einkenni útvegi öðrum einstaklingi umboð til að sækja lyf fyrir sig.