Frá sóttvarnalækni

06.12.2021

Góður árangur af örvunarskammti bóluefna gegn COVID-19.

Í útreikningum Thors Aspelund líftölfræðings við Háskóla Islands hefur komið fram að örvunarskammtur bóluefnis (þriðji skammtur) gegn COVID-19 verndar u.þ.b 90% betur en grunnbólusetning (tveir skammtar) gegn delta afbrigði SARS-CoV-2. Þetta sést glöggt þegar nýgengi smita af völdum COVID-19 er skoðað eftir örvunarskammt og borið saman við nýgengi hjá þeim sem einungis hafa fengið grunnbólusetningu (sjá mynd). Einnig sést vel á línuriti hér að neðan hversu vel grunnbólusetningin verndar gegn spítalainnlögnum og hversu vel hún verndar börn á aldrinum 12-15 ára.

Þessar upplýsingar eiga að vera öllum hvatning til að fara í bólusetningu og þiggja jafnframt örvunarbólusetningu. Á þessari stundu eru ekki áform um að bjóða börnum örvunarbólusetningu í ljósi þess hversu vel grunnbólusetningin verndar börnin. Hins vegar er ekki vitað hversu lengi verndin mun vara hvorki hjá börnum né eftir örvunarbólusetninguna.

Óvissa er uppi um hvort bólusetning eða fyrri sýking af völdum COVID-19 muni vernda gegn hinu nýja omicron afbrigði. Þessi óvissa á hins vegar ekki að koma í veg fyrir að allir mæti í bólusetningu og þiggi örvunarskammt því delta afbrigðið er hér allsráðandi og er að valda þeim alvarlegu veikindum sem við erum nú að eiga við.

Til baka á forsíðu